Kryetari i Skenderajt, Sami Lushtaku, i cili përgjatë katër vjetëve të mandatit të tij gjendej në paraburgim, ka folur për gjendjen e Partisë Demokratike, të cilën ai e gjeti pas u lirua nga burgu.

Sami Lushtaku nuk e sheh me optimizëm rezultatin e zgjedhjeve të 11 qershorit, duke përmendur faktin se PDK humbi shtatë mijë vota në bastionin e saj të cilin ai e drejton.

Kryetari i Skenderajt ka treguar arsyet që, sipas tij, PDK pati rënie në zgjedhjet e 11 qershorit, ndërsa ka shprehur se opozita është opsioni më i përshtatshëm që ai beson se PDK e ka para vetës. Edhe pse PDK, në kuadër të koalicionit PAN, këmbëngul ta krijojë qeverinë duke thënë se e ka siguruar shumicën parlamentare, Lushtaku nuk e mendon të njëjtën me PDK’në, duke bërë të ditur se ai preferon opozitën për partinë e tij.

Lushtaku fajëson selinë qendrore të PDK’së për shkak se, sipas tij, qendra e kësaj partie është distancuar nga qytetarët dhe nga terreni.Lëvizja Vetëvendosje është njëra ndër arsyet që kryetari i Skenderajt dëshiron që PDK të kthehet në forcë opozitare për të testuar VV’në në pushtet, përkatësisht sjelljet e kësaj të fundit në qeverisje.